ಅನ್ನಭಾಗ್ಯ ಅಕ್ಕಿ ಸಾಗಾಟದ ಹಿಂದೆ ಕಾಳಸಂತೆ ಜಾಲದ ಶಂಕೆ? ಕೆಎ-04, ಎಬಿ-7597 ನೋಂದಣಿ ಸಂಖ್ಯೆಯ ವಾಹನದಲ್ಲಿ ಸರ್ಕಾರಿ ಗುರುತು ಹೊಂದಿರುವ ಸುಮಾರು 180 ಚೀಲ ಅಕ್ಕಿ ಪತ್ತೆ.!

ಹರಿಹರ: ಬಡವರ ಪಾಲಿನ ಅನ್ನಭಾಗ್ಯ ಯೋಜನೆಯ ಅಕ್ಕಿಯನ್ನು ಅಕ್ರಮವಾಗಿ ಸಾಗಿಸಲಾಗುತ್ತಿದೆ ಎಂಬ ಗಂಭೀರ ಆರೋಪಕ್ಕೆ ಪುಷ್ಟಿ ನೀಡುವ ರೀತಿಯಲ್ಲಿ, ಹರಿಹರ ನಗರದ ಎಪಿಎಂಸಿ ಸಮೀಪದ ಬಾಲಾಜಿ ರೈಸ್ ಮಿಲ್ ಆವರಣದಲ್ಲಿ ಸರ್ಕಾರಿ ಗುರುತು ಹೊಂದಿರುವ ಸುಮಾರು 180 ಚೀಲ ಅಕ್ಕಿ ಪತ್ತೆಯಾಗಿರುವ ಘಟನೆ ತಡರಾತ್ರಿ ಬೆಳಕಿಗೆ ಬಂದಿದೆ.

ಭಾನುವಾರ ತಡರಾತ್ರಿ ಸುಮಾರು 3.45ರ ವೇಳೆಗೆ, ಕೆಎ-04, ಎಬಿ-7597 ನೋಂದಣಿ ಸಂಖ್ಯೆಯ ಭಾರತ್ ಬೆಂಜ್ ಲಾರಿಯಲ್ಲಿ ಅನ್ನಭಾಗ್ಯ ಯೋಜನೆಗೆ ಸಂಬಂಧಿಸಿದ ಸರ್ಕಾರಿ ಗುರುತು ಹೊಂದಿರುವ ಅಕ್ಕಿಯ ಚೀಲಗಳು ಪತ್ತೆಯಾಗಿವೆ ಎನ್ನಲಾಗಿದೆ.

ಬಡವರಿಗಾಗಿ ಸರ್ಕಾರ ವಿತರಿಸುವ ಅನ್ನಭಾಗ್ಯ ಅಕ್ಕಿ ನ್ಯಾಯಬೆಲೆ ಅಂಗಡಿಗಳ ಮೂಲಕ ಫಲಾನುಭವಿಗಳಿಗೆ ತಲುಪಬೇಕಿದೆ. ಆದರೆ, ಇದೇ ಅಕ್ಕಿ ಇಷ್ಟು ದೊಡ್ಡ ಪ್ರಮಾಣದಲ್ಲಿ ಖಾಸಗಿ ವಾಹನದಲ್ಲಿ ಪತ್ತೆಯಾಗಿರುವುದು ಹಲವು ಅನುಮಾನಗಳಿಗೆ ಕಾರಣವಾಗಿದೆ.

ಬಡವರ ಅಕ್ಕಿ ಕಾಳಸಂತೆಗೆ ಸೇರುತ್ತಿದೆಯೇ?

ನ್ಯಾಯಬೆಲೆ ಅಂಗಡಿಗಳಿಂದ ಬಡವರ ಪಾಲಿನ ಅಕ್ಕಿಯನ್ನು ಕೆಲವರು ಅಕ್ರಮವಾಗಿ ಖರೀದಿಸಿ, ನಂತರ ಖಾಸಗಿ ಅಕ್ಕಿ ಗಿರಣಿಗಳ ಆವರಣದಲ್ಲಿ ಸಂಗ್ರಹಿಸಿ ಕಾಳಸಂತೆಯಲ್ಲಿ ಮಾರಾಟ ಮಾಡುತ್ತಿದ್ದಾರೆ ಎಂಬ ಆರೋಪಗಳು ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿವೆ.

ಈ ಹಿನ್ನೆಲೆಯಲ್ಲಿ ಬಾಲಾಜಿ ರೈಸ್ ಮಿಲ್ ಆವರಣದಲ್ಲಿ ಪತ್ತೆಯಾದ ಸುಮಾರು 180 ಚೀಲ ಅಕ್ಕಿಯ ಮೂಲವೇನು ಎಂಬುದನ್ನು ಸಂಬಂಧಿಸಿದ ಅಧಿಕಾರಿಗಳು ಸಮಗ್ರವಾಗಿ ತನಿಖೆ ನಡೆಸಬೇಕಾಗಿದೆ.

ಯಾವ ನ್ಯಾಯಬೆಲೆ ಅಂಗಡಿಯಿಂದ ಈ ಅಕ್ಕಿ ಹೊರಬಂದಿದೆ?
ಅಕ್ಕಿಯನ್ನು ಯಾರು ಖರೀದಿಸಿದ್ದಾರೆ?
ಯಾವ ಉದ್ದೇಶಕ್ಕಾಗಿ ಲಾರಿಯಲ್ಲಿ ಸಂಗ್ರಹಿಸಲಾಗಿತ್ತು?
ಈ ಅಕ್ಕಿಯನ್ನು ಎಲ್ಲಿಗೆ ಸಾಗಿಸಲಾಗುತ್ತಿತ್ತು?

ಎಂಬ ಹಲವು ಪ್ರಶ್ನೆಗಳು ಇದೀಗ ಸಾರ್ವಜನಿಕರಲ್ಲಿ ಮೂಡಿವೆ.

ಮಂದಾರ ಜ್ವಾಲೆಗೆ ದೊರೆತ ಮಾಹಿತಿಯ ಆಧಾರದಲ್ಲಿ ಸ್ಥಳ ಪರಿಶೀಲನೆ.

ಈ ಕುರಿತು ಖಚಿತ ಮಾಹಿತಿ ದೊರೆತ ಹಿನ್ನೆಲೆಯಲ್ಲಿ ಮಂದಾರ ಜ್ವಾಲೆ ವಾರಪತ್ರಿಕೆಯ ತಂಡ ಸ್ಥಳಕ್ಕೆ ತೆರಳಿ ಪರಿಶೀಲಿಸಿದಾಗ, ಲಾರಿಯಲ್ಲಿ ದೊಡ್ಡ ಪ್ರಮಾಣದ ಅಕ್ಕಿ ಚೀಲಗಳು ಕಂಡುಬಂದಿವೆ. ಘಟನೆಗೆ ಸಂಬಂಧಿಸಿದ ನೈಜ ದೃಶ್ಯಗಳನ್ನು ಹಾಗೂ ಲಭ್ಯವಿರುವ ಮಾಹಿತಿಯನ್ನು ಸಂಬಂಧಿಸಿದ ಇಲಾಖೆ ಅಧಿಕಾರಿಗಳ ಗಮನಕ್ಕೂ ಮಾಧ್ಯಮದ ವತಿಯಿಂದ ತರಲಾಗಿದೆ.

ಸರ್ಕಾರದ ಗುರುತು ಹೊಂದಿರುವ ಇಷ್ಟು ದೊಡ್ಡ ಪ್ರಮಾಣದ ಅಕ್ಕಿ ಖಾಸಗಿ ವಾಹನದಲ್ಲಿ ಪತ್ತೆಯಾಗಿರುವುದು ಸಾಮಾನ್ಯ ಸಂಗತಿಯಲ್ಲ. ಇದರ ಹಿಂದೆ ಯಾವುದಾದರೂ ವ್ಯವಸ್ಥಿತ ಜಾಲ ಕಾರ್ಯನಿರ್ವಹಿಸುತ್ತಿದೆಯೇ ಎಂಬ ಅನುಮಾನ ಮೂಡಿರುವ ಹಿನ್ನೆಲೆಯಲ್ಲಿ ಅಧಿಕಾರಿಗಳು ಯಾವುದೇ ಒತ್ತಡಕ್ಕೆ ಮಣಿಯದೆ ನಿಷ್ಪಕ್ಷಪಾತ ತನಿಖೆ ನಡೆಸಬೇಕಾಗಿದೆ.

ಅಧಿಕಾರಿಗಳ ಮೌನಕ್ಕೂ ಉತ್ತರ ಬೇಕಿದೆ

ಇಷ್ಟು ದೊಡ್ಡ ಪ್ರಮಾಣದ ಅನ್ನಭಾಗ್ಯ ಅಕ್ಕಿ ಅಕ್ರಮವಾಗಿ ಸಂಗ್ರಹವಾಗುತ್ತಿದೆ ಅಥವಾ ಸಾಗಾಟವಾಗುತ್ತಿದೆ ಎಂಬ ಆರೋಪಗಳಿದ್ದರೂ ಸಂಬಂಧಿಸಿದ ಇಲಾಖೆಗಳ ಗಮನಕ್ಕೆ ಇದು ಬಂದಿರಲಿಲ್ಲವೇ? ಬಂದಿದ್ದರೆ ಈವರೆಗೆ ಏಕೆ ಕ್ರಮ ಕೈಗೊಳ್ಳಲಾಗಿಲ್ಲ? ಎಂಬ ಪ್ರಶ್ನೆಗಳಿಗೂ ಅಧಿಕಾರಿಗಳು ಉತ್ತರಿಸಬೇಕಾಗಿದೆ.

ಸರ್ಕಾರದ ಅನ್ನಭಾಗ್ಯ ಯೋಜನೆಯ ಉದ್ದೇಶವೇ ಬಡ ಕುಟುಂಬಗಳಿಗೆ ಆಹಾರ ಭದ್ರತೆ ಒದಗಿಸುವುದು. ಅಂತಹ ಯೋಜನೆಯ ಅಕ್ಕಿಯೇ ಅಕ್ರಮವಾಗಿ ಬೇರೆಡೆಗೆ ತಿರುಗಿದರೆ, ಅದು ನೇರವಾಗಿ ಅರ್ಹ ಫಲಾನುಭವಿಗಳ ಹಕ್ಕಿಗೆ ಧಕ್ಕೆಯಾಗುತ್ತದೆ.

ಜಂಟಿ ತನಿಖೆಯಿಂದ ಸತ್ಯ ಹೊರಬರಲಿ

ಹರಿಹರ ತಾಲೂಕು ದಂಡಾಧಿಕಾರಿಗಳು ಹಾಗೂ ತಾಲೂಕು ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆ ಅಧಿಕಾರಿಗಳು ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿ ಜಂಟಿ ತನಿಖೆ ನಡೆಸಬೇಕು ಎಂಬುದು ಸಾರ್ವಜನಿಕರ ಒತ್ತಾಯವಾಗಿದೆ.

ಪತ್ತೆಯಾದ ಅಕ್ಕಿಯ ಚೀಲಗಳ ಮೂಲ, ಅವುಗಳಿಗೆ ಸಂಬಂಧಿಸಿದ ನ್ಯಾಯಬೆಲೆ ಅಂಗಡಿ, ಸಾಗಾಟದ ದಾಖಲೆಗಳು, ವಾಹನದ ಮಾಲೀಕತ್ವ, ಅಕ್ಕಿಯನ್ನು ಸಾಗಿಸುತ್ತಿದ್ದ ವ್ಯಕ್ತಿಗಳು ಹಾಗೂ ಬಾಲಾಜಿ ರೈಸ್ ಮಿಲ್ ಆವರಣದಲ್ಲಿ ಅದರ ಸಂಗ್ರಹಣೆಗೆ ಕಾರಣವಾದವರು ಯಾರು ಎಂಬುದನ್ನು ತನಿಖೆಯ ಮೂಲಕ ಪತ್ತೆಹಚ್ಚಬೇಕಿದೆ.

ತನಿಖೆಯಲ್ಲಿ ಯಾವುದೇ ನ್ಯಾಯಬೆಲೆ ಅಂಗಡಿ ಅಥವಾ ವ್ಯಕ್ತಿಯ ಅಕ್ರಮ ಭಾಗವಹಿಸುವಿಕೆ ದೃಢಪಟ್ಟರೆ, ಕಾನೂನು ಮತ್ತು ನಿಯಮಾನುಸಾರ ಕಠಿಣ ಕ್ರಮ ಕೈಗೊಳ್ಳಬೇಕು. ತಪ್ಪಿತಸ್ಥರನ್ನು ರಕ್ಷಿಸುವ ಬದಲು, ಬಡವರ ಪಾಲಿನ ಅಕ್ಕಿಯನ್ನು ದುರುಪಯೋಗಪಡಿಸಿಕೊಳ್ಳುವ ಯಾವುದೇ ಜಾಲವಿದ್ದರೂ ಅದರ ಸಂಪೂರ್ಣ ಮೂಲವನ್ನು ಬಯಲಿಗೆಳೆಯಬೇಕು.

ಬಡವರ ಅನ್ನಕ್ಕೆ ಕನ್ನ ಹಾಕುವವರಿಗೆ ಕಡಿವಾಣ ಯಾವಾಗ?

ಅನ್ನಭಾಗ್ಯ ಯೋಜನೆಯ ಅಕ್ಕಿ ಅರ್ಹ ಫಲಾನುಭವಿಗಳ ಮನೆ ತಲುಪಬೇಕೇ ಹೊರತು ಕಾಳಸಂತೆಯ ಮಾರ್ಗದಲ್ಲಿ ಖಾಸಗಿ ಗೋದಾಮು, ಗಿರಣಿ ಅಥವಾ ಮಾರುಕಟ್ಟೆ ಸೇರಬಾರದು.

ಆದ್ದರಿಂದ ಈ ಪ್ರಕರಣವನ್ನು ಕೇವಲ ಲಾರಿಯಲ್ಲಿ ಅಕ್ಕಿ ಪತ್ತೆಯಾದ ಘಟನೆ ಎಂದು ಪರಿಗಣಿಸದೆ, ಅಕ್ಕಿಯ ಮೂಲದಿಂದ ಹಿಡಿದು ಅದರ ಅಂತಿಮ ಗಮ್ಯಸ್ಥಾನದವರೆಗೆ ಸಂಪೂರ್ಣ ತನಿಖೆ ನಡೆಸಿ ಸತ್ಯವನ್ನು ಸಾರ್ವಜನಿಕರ ಮುಂದೆ ಬಹಿರಂಗಪಡಿಸಬೇಕು.

ಬಡವರ ಪಾಲಿನ ಅನ್ನವನ್ನು ದುರುಪಯೋಗಪಡಿಸಿಕೊಳ್ಳುವವರ ವಿರುದ್ಧ ಕಠಿಣ ಕ್ರಮ ಕೈಗೊಂಡು, ಇಂತಹ ಅಕ್ರಮ ದಂಧೆಗಳಿಗೆ ಶಾಶ್ವತವಾಗಿ ಕಡಿವಾಣ ಹಾಕಬೇಕಿದೆ.

— ಮಂದಾರ ಜ್ವಾಲೆ ವಾರಪತ್ರಿಕೆ

Post a Comment

0 Comments