ಚಿನ್ನದ ನಿಕ್ಷೇಪ ಪತ್ತೆ, ರೈತರಲ್ಲಿ ಹೆಚ್ಚಿದ ಆತಂಕ.

🔥ಮಂದಾರ ಜ್ವಾಲೆ: ಹಾವೇರಿ ಜಿಲ್ಲೆಯ ಗಣಜೂರು ಗ್ರಾಮದಲ್ಲಿ ದೊಡ್ಡ ಪ್ರಮಾಣದ ಚಿನ್ನದ ನಿಕ್ಷೇಪ ಪತ್ತೆಯಾಗಿದೆ. 'ಡೆಕ್ಕನ್ ಗೋಲ್ಡ್ ಮೈನ್ಸ್' (Deccan Gold Mines) ಕಂಪನಿಯು ಈ ಪ್ರದೇಶದಲ್ಲಿ ದೀರ್ಘಕಾಲದಿಂದ ಸಂಶೋಧನೆ ನಡೆಸಿ, ಚಿನ್ನದ ನಿಕ್ಷೇಪ ಇರುವುದನ್ನು ಖಚಿತಪಡಿಸಿದೆ. 

ಸುಪ್ರೀಂಕೋರ್ಟ್‌ನ ಇತ್ತೀಚಿನ ಮಹತ್ವದ ಆದೇಶದ ಬಳಿಕ, ಇಲ್ಲಿ ಪೂರ್ಣ ಪ್ರಮಾಣದ ಚಿನ್ನದ ಗಣಿಗಾರಿಕೆ ಆರಂಭವಾಗುವ ಲಕ್ಷಣಗಳು ದಟ್ಟವಾಗಿವೆ.ಇದರೊಂದಿಗೆ ಭಾರತೀಯ ಭೂವೈಜ್ಞಾನಿಕ ಸಮೀಕ್ಷೆ (GSI) ಸಂಸ್ಥೆಯು ಜಿಲ್ಲೆಯ ಇನ್ನೂ ಕೆಲವು ಹೊಸ ವಲಯಗಳಲ್ಲಿಯೂ ಚಿನ್ನದ ಶೋಧ ಕಾರ್ಯವನ್ನು ಚುರುಕುಗೊಳಿಸಿದೆ.

ಹಾವೇರಿ ಜಿಲ್ಲೆಯ ಚಿನ್ನದ ನಿಕ್ಷೇಪ ಮತ್ತು ಗಣಿಗಾರಿಕೆ ಪ್ರಕ್ರಿಯೆಯ ಪ್ರಮುಖ ವಿವರಗಳು ಇಲ್ಲಿವೆ:

ನಿಕ್ಷೇಪ ಪತ್ತೆಯಾದ ಪ್ರಮುಖ ಪ್ರದೇಶಗಳು 

ಗಣಜೂರು ಮುಖ್ಯ ವಲಯ:* ಹಾವೇರಿ ತಾಲೂಕಿನ ಗಣಜೂರು ಗ್ರಾಮದ ವ್ಯಾಪ್ತಿಯಿಂದ ನಾಗೇಂದ್ರನ ಮಟ್ಟಿ ಗ್ರಾಮದವರೆಗೆ ಸುಮಾರು 72 ಎಕರೆ ಪ್ರದೇಶದಲ್ಲಿ ಸಮೀಕ್ಷೆ ನಡೆಸಲಾಗಿದ್ದು, ಇಲ್ಲಿ ದೊಡ್ಡ ಮಟ್ಟದ ಚಿನ್ನದ ನಿಕ್ಷೇಪ ಪತ್ತೆಯಾಗಿದೆ.

*ಹೊಸ ಸಂಭಾವ್ಯ ವಲಯಗಳು:* ಅಧಿಕಾರಿಗಳ ಮಾಹಿತಿ ಪ್ರಕಾರ, ಗಣಜೂರು ಮಾತ್ರವಲ್ಲದೆ ಜಿಲ್ಲೆಯ ನಾಗವಂದ, ಕಾಕೋಳ, ಚಿನ್ನಿಕಟ್ಟಿ, ಸಾಲುಗುಡ್ಡ ಮತ್ತು ಸಂಕ್ರಿಕೊಪ್ಪ ಗ್ರಾಮಗಳ ಸುತ್ತಮುತ್ತಲಿನ ಪ್ರದೇಶಗಳಲ್ಲಿಯೂ ಪ್ರಾಥಮಿಕ ಸಮೀಕ್ಷೆ ನಡೆಸಲಾಗುತ್ತಿದ್ದು, ಚಿನ್ನದ ಲಕ್ಷಣಗಳು ಕಂಡುಬಂದಿವೆ.ಗಣಿಗಾರಿಕೆ ಆರಂಭಕ್ಕೆ ಹಾದಿ ಸುಗಮ

*ಸುಪ್ರೀಂಕೋರ್ಟ್ ಆದೇಶ:* 2015 ರಲ್ಲಿ ಗಣಿಗಾರಿಕೆ ಕೋರಿ ಕಂಪನಿ ಸಲ್ಲಿಸಿದ್ದ ಅರ್ಜಿಯನ್ನು ಸರ್ಕಾರ ತಿರಸ್ಕರಿಸಿತ್ತು. ಆದರೆ, ಇತ್ತೀಚೆಗೆ ಸುಪ್ರೀಂಕೋರ್ಟ್ ನೀಡಿದ ಬೇರೆ ಒಂದು ಪ್ರಕರಣದ ತೀರ್ಪು ಈಗ ಈ ಗಣಜೂರು ಯೋಜನೆಗೆ ಪೂರಕವಾಗಿದ್ದು, ಗಣಿ ಆರಂಭದ ಚರ್ಚೆಗಳು ಮತ್ತೆ ಮುಂಚೂಣಿಗೆ ಬಂದಿವೆ.

*ಆರ್ಥಿಕ ಲಾಭದ ಲೆಕ್ಕಾಚಾರ:* ಹಿಂದೆ ಚಿನ್ನದ ಬೆಲೆ ಕಡಿಮೆ ಇದ್ದಾಗ ಒಂದು ಟನ್ ಬಂಡೆಯಲ್ಲಿ ಕನಿಷ್ಠ 4 ಗ್ರಾಂ ಚಿನ್ನ ಸಿಕ್ರೆ ಮಾತ್ರ ಲಾಭದಾಯಕ ಎನ್ನಲಾಗುತ್ತಿತ್ತು. ಆದರೆ ಈಗ ಚಿನ್ನದ ಬೆಲೆ ಗಗನಕ್ಕೇರಿರುವುದರಿಂದ, ಒಂದು ಟನ್ ಬಂಡೆಯಲ್ಲಿ 1 ರಿಂದ 2 ಗ್ರಾಂ ಚಿನ್ನ ಸಿಕ್ಕರೂ ಗಣಿಗಾರಿಕೆ ನಡೆಸುವುದು ಲಾಭದಾಯಕವಾಗಿದೆ.

*ಸ್ಥಳೀಯ ರೈತರಲ್ಲಿ ಆತಂಕ ಭೂಮಿ ಕಳೆದುಕೊಳ್ಳುವ ಭೀತಿ:* ಸಮೀಕ್ಷೆ ನಡೆಸಿರುವ 72 ಎಕರೆ ಪ್ರದೇಶದ ಫಲವತ್ತಾದ ಕೃಷಿ ಜಮೀನನ್ನು ಗಣಿಗಾರಿಕೆಗಾಗಿ ಬಿಟ್ಟುಕೊಡಬೇಕಾಗಬಹುದು ಎಂಬ ಆತಂಕ ಸ್ಥಳೀಯ ರೈತರಲ್ಲಿದೆ.

*ಪರಿಸರ ಸಮಸ್ಯೆ:* ಗಣಿಗಾರಿಕೆ ಆರಂಭವಾದರೆ ತಮ್ಮ ಹಳ್ಳಿಗಳ ಪರಿಸರ ಹಾಳಾಗಬಹುದು ಮತ್ತು ಗ್ರಾಮಗಳು ಅವನತಿಯತ್ತ ಸಾಗಬಹುದು ಎಂಬ ಆತಂಕವನ್ನು ಸ್ಥಳೀಯರು ವ್ಯಕ್ತಪಡಿಸುತ್ತಿದ್ದಾರೆ.